Bodumedi
Mophaso ke thapelo ye kgolo ya Mosotho wa lebowa. Go ya ka tumelo ya Basotho ba lebowa, mophaso ke o mongwe wa mekgwa ye setšhaba se ikopanyago le badimo ka gona. Badimo ke bona ba tšeago dillo goba mathata a batho ba iša go Kgobeane morwa wa Kgobe. Kgobe ke leina le le dirišwago sebakeng sa Modimo, gomme Kgobeane ke morwa wa Kgobe.
Kgobe ke yena mohlodi wa legodimo le lefase, gomme Kgobeane ke mohlodi wa diphidi go akaretša le batho. Ke ka fao ba bangwe ba rego ge ba bolela ba fela ba re ' ke motho wa Kgobe', ba šupa gore ke motho ke sebopiwa sa Modimo. Ka setho, badimo ga ba gopolwe ka dinako tša mathata fela. Setšhaba gantši se gopola le gona go begela badimo ge se nyaka dilo tša go swana le pula, go bega molwetši goba gona go leboga ge se bunne wa go tlala seatla.
Gona le mabaka a mantši ao a dirago gore batho ba ikopanye le badimo go swana le go phasa. Go phasa go ka dirwa ke lapa, kgoro (kgoro ke malapa a goba mmogo), malapa a sefane se tee goba ba mošate. Ke mošate fela o nago le maatla a go kgopela pula go badimo. Basotho ba Leboa ba dumela gore motho fela a ka se ikopanye le Modimo ge e se ka badimo.
Gantši ba dumela gore ge go na le motho yo a fokolago ka lapeng, yena motho yoo o hwetša a fela a etelwa ke makgolo wa gagwe yo a iketšego badimong kgale ka mokgwa wa ditoro. Toro re bjalo e a tšewa ya išwa batswading. Batswadi ba kgona go hlaloša gore toro ya gona e šupa eng goba ge ba sa kgone go ka hlaloša, ba kgona go ya go ngaka ya kgauswi gore e di tšholle.
Ngaka ke yona e fago tumelelo ya gore go phasiwe bjang le gona lebitleng la mang. Mophasong go tšhollwa madi. E ka ba a pudi, kgomo, diphoofolo tše dingwe go ya le ka dinyakwa tša wona mophaso woo. Gantši nama ya phoofolo yeo e re go jewa marapo a yona a išwa lebitleng la motho yo ba bego ba ipega go yena. Le bjala bja setšo bo a tšhollelwa mo lebitleng.
Go hlaloša ditoro ga se selo seo mang le mang a ka se dirago. Gantši ge motho a hlaloša sebopego sa motho yo o mo lorilego, batswadi ba kgona go tseba gore motho yoo ke mang. O hwetša gore ke bogolo tala mola motho wa gona a ikelago badimong.
Ge go phaswa
Ka nako ye nngwe o hwetša gore ngwana ga gona selo se a rego ge a se dira tša mo motsogela. Mohlala, o hwetša a rata go bapala ka maswikana, kudu ge e le gore o tla ba ngaka ye kgolo ge a gola. Ba re maswika a šupa selo sa go swana le ditaola. Bjona bongaka bjoo e ka ba bja makgolo wa gagwe goba yo mongwe yo a ilego ga aotwanahunyela kgale kgale.
Mathomong
